Få saker får kjenslene slik i sving som lokale namn. Det kan vi godt skjøna.
Namna seier noko om stadene vi kjenner, og det er ein del av oss. Identiteten, heiter det på fagspråket.
Derfor blir det lett ugreie når andre folk har andre namn på «våre» stader, eller om namna endrar seg, av fleire grunnar kanskje:
1. Namnet kan ha uklart opphav
2. Namnet er litt uklart uttala, jfr. dialekter
3. Namnet er endra med vilje
Ta no dei to oddane som stikk ut i Sørfjorden vest for Finneidet.
Eldste dokumentasjon eg har funne er frå 1893. Kaptein Ramen laga da eit kart over heile området her, sannsynlegvis mest til offentleg og militært bruk.
Næraste odde heiter: Finneidkalvneset.
Eit gårdskart frå 1899 av S.H.Tangen viser same odde: Karnesset
Så i 1908 eit offentleg kart fra NGO: Kvalneset
Men kva seiest det i bygdeboka «Gård og slekt»? Jau, i 1913 fråskilt bruk 5 får vi bruk nr. 6 Kleivneset. Og dette namnet held seg den dag i dag.
No skal ikkje eg gi meg ut på utgreiing her, men det kan synast som den opphaveleg tydinga var Kalvneset, og sannsynleg også, eksempelvis at kalvane gjekk på beite der. Karnesset kan forklarast ut frå samandraging ved uttale. Men derifrå til Kvalneset må det ha foregått ei ombytting, eller ei slags misforståing. Lettare er det å forstå overgangen til Kleivneset.Da var det nok slutt på hamning for kalvar der, og dei som busette seg den gongen, fann det rimeleg med nytt namn på neset, sidan dei budde rett ved Kleiva, som er eldgamalt namn på brattlendet vestover frå Finneidet.
Slik endring kan kanskje også forklara namnet Kalneset i Korgen. Det er dokumentert at Oldernesgården på 1800-talet, ja seinare og, hadde kalvar på beite der. Skal vi tru at det opphaveleg namnet var Kalvneset på denne staden også?
